ഹേമ കമ്മിറ്റി റിപ്പോര്‍ട്ടില്‍ പ്രതികരണവുമായി നടി സോമി അലി. സിനിമയില്‍ സ്ത്രീകള്‍ക്ക് നേരേ നടക്കുന്ന അതിക്രമങ്ങള്‍ സത്യമാണെന്നും താനത് നേരിട്ട് കണ്ടിട്ടുവെന്നും സോമി അലി പറയുന്നു. ഒരു ദേശീയ മാധ്യമത്തിന് നല്‍കിയ അഭിമുഖത്തിലായിരുന്നു നടി ഹേമാ കമ്മിറ്റി റിപ്പോര്‍ട്ടിനെക്കുറിച്ച് പ്രതികരിച്ചത്. കരിയറില്‍ മുന്നേറാന്‍ വഴങ്ങണമെന്ന് തന്നോട് പലരും പറഞ്ഞിട്ടുണ്ടെന്നും അതിന് തയ്യാറായിരുന്നില്ലെന്നും സോമി പറയുന്നു.
ഹേമ കമ്മിറ്റി റിപ്പോര്‍ട്ട് കേരളത്തില്‍ മാത്രമല്ല ഇന്ത്യന്‍ സിനിമയ്ക്ക് മുഴുവന്‍ ഒരു മുന്നറിയിപ്പാണ്. സ്ത്രീയാകട്ടെ പുരുഷനാകട്ടെ, സിനിമയില്‍ എല്ലാവര്‍ക്കും ഭയമില്ലാതെ സ്വതന്ത്ര്യമായി ജോലി ചെയ്യാന്‍ സാധിക്കണം. ഞാന്‍ അഭിനയിക്കുന്ന കാലത്ത് പലരും പറഞ്ഞിട്ടുണ്ട്, മുന്നേറണമെങ്കില്‍ പലരുടെയും ഹോട്ടല്‍ സ്യൂട്ടിലേക്ക് കയറി ചെല്ലണമെന്ന്. സിനിമയിലെ വലിയ താരങ്ങളുടെ മുറിയില്‍ നിന്ന് അപമാനത്തോടെ വേദനയോടെ ഇറങ്ങിപ്പോകുന്ന നടിമാരെ ഞാന്‍ കണ്ടിട്ടുണ്ട്. വിവാഹം കഴിഞ്ഞ് മാന്യമായി ജീവിക്കുന്നു എന്നവകാശപ്പെടുന്ന പലരും വേട്ടക്കാരുടെ കൂട്ടത്തിലുണ്ട്- സോമി അലി പറഞ്ഞു.
നോ മോര്‍ ടിയേഴ്‌സ് എന്ന പേരില്‍ ഒരു സന്നദ്ധ സംഘടന സ്ഥാപിച്ച സോമി അലി ഒട്ടേറെ ജീവകാരുണ്യപ്രവര്‍ത്തനങ്ങള്‍ക്ക് വര്‍ഷങ്ങളായി നേതൃത്വം നല്‍കുന്നു. ഗാര്‍ഹിക പീഡനം, മനുഷ്യക്കടത്ത്, ലൈംഗിക പീഡനം തുടങ്ങിയവയുടെ ഇരകളെ ജീവിതത്തിലേക്ക് തിരിച്ചുകൊണ്ടുവരാനാണ് നോ മോര്‍ ടിയേഴ്‌സ് സ്ഥാപിച്ചത്. സ്ത്രീകള്‍, കുട്ടികള്‍, പുരുഷന്‍മാര്‍ എല്‍.ജി.ബി.ടി.ക്യു തുടങ്ങി എല്ലാ വിഭാഗത്തിലുള്ളവര്‍ക്കും ഈ സംഘടന സേവനം നല്‍കുന്നു.
1990 കളില്‍ ബോളിവുഡില്‍ അറിയപ്പെടുന്ന നടിയായിരുന്നു സോമി അലി. പാകിസ്താനില്‍ ജനിച്ച് അമേരിക്കയില്‍ വളര്‍ന്ന ഇവര്‍ സ്‌കൂള്‍ വിദ്യാഭ്യാസം കഴിഞ്ഞയുടന്‍ ബോളിവുഡില്‍ ഭാഗ്യം പരീക്ഷിക്കാന്‍ മുംബൈയിലേക്ക് ചേക്കേറി. ബോളിവുഡ് നടന്‍ സല്‍മാന്‍ ഖാനോട് തോന്നിയ ആരാധനയാണ് അതിന് കാരണമായത്. മോഡലിങിലെത്തിയ സോമി അലി പിന്നീട് പതിയെ സിനിമയില്‍ ചെറിയ വേഷങ്ങളില്‍ അഭിനയിച്ചു തുടങ്ങി.
അതിനിടെ സല്‍മാന്‍ ഖാനെ പരിചയപ്പെടുകയും പ്രണയത്തിലാകുകയും ചെയ്തു. ക്രിഷന്‍ അവതാര്‍, ആന്തോളന്‍, മാഫിയ ചുപ് തുടങ്ങിയ സിനിമകളില്‍ വേഷമിട്ട നടി സല്‍മാനുമായുള്ള പ്രണയത്തകര്‍ച്ചയ്ക്ക് ശേഷം 1999 ല്‍ അമേരിക്കിലേക്ക് തിരിച്ചുപോയി. അതോടെ അഭിനയം നിര്‍ത്തുകയും പഠനത്തില്‍ ശ്രദ്ധകേന്ദ്രീകരിക്കുകയും ചെയ്തു. പിന്നീട് അമേരിക്കയില്‍ ജോലി ചെയ്തുകൊണ്ട് തെക്കന്‍ ഏഷ്യയിലെ സ്ത്രീകളുടെ ഉന്നമനത്തിനായി വിവിധ സംഘടനകളുമായി ചേര്‍ന്ന് സോമി അലി പ്രവര്‍ത്തിച്ചു. പിന്നീടാണ് നോ മോര്‍ ടിയേഴ്‌സ് സ്ഥാപിക്കുന്നത്. അമേരിക്കന്‍ ഹെറിറ്റേജ് പുരസ്‌കാരം, ദെ ഡൈലി പോയിന്റ് ഓഫ് ലൈറ്റ് പുരസ്‌കാരം എന്നിങ്ങനെ ഒട്ടേറെ അംഗീകാരങ്ങള്‍ ഈ സംഘടന നേടിയിട്ടുണ്ട്.
Content Highlights: Somy Ali On Bollywood's Toxicity Amid Mollywood #MeToo Row
Published: 02 Sept 2024, 08:53 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented